>首页 > 推新聞 > 香港
網議政事:《蘋果》煽情吸「獨」被鬧爆
2019年02月10日 08:59 来源: 香港商報網
查看数0

■旺暴3周年當晚,《蘋果》喺fb登咗張圖玩煽情。 fb圖片

■旺暴3周年當晚,《蘋果》喺fb登咗張圖玩煽情。 fb圖片

為咗選票、議席同豐厚人工,主流反對派真係可以乜都做得出,「今天的我打倒昨天的我」呢啲原則性問題,對佢哋嚟講真係小事一樁,做多幾次都無妨。3年前嘅旺角暴亂,主流反對派金主兼選舉機器《蘋果日報》譴責暴力,3年之後就「感慨」班暴徒「為捍衛幾粒魚蛋,犧牲咗人生中最美好嘅年華」,真係博香港人啲記憶好似金魚咁短暫。唔少「港獨」分子鬧爆《蘋果》貓哭老鼠,都係旨在幫主流反對派喺年底區選同出年立法會選舉吸「本土派」、「獨派」啲票,不過唔使旨意佢哋將啲票射過去! 

記者 鄭治祖

喺旺暴3周年當晚,《蘋果》喺facebook登咗張圖,係今年旺角夜市同3年前旺暴期間嘅對比,仲懶感性咁整咗句:「每逢新年行經旺角夜市,都會不其然諗起......2016年嘅今日,曾經有班人為捍衛幾粒魚蛋,犧牲咗人生中最美好嘅年華。」

當年旺暴光速譴責

可能真係有啲香港人只係有金魚嘅記憶,但「港獨」分子個腦仲有大把位記邊個得罪過佢哋,就好似撐開旺暴推手「本土民主前線」嘅「Takki Ma」:「原先《蘋果》同『泛民』係九秒九譴責梁天琦黃台仰及一眾行動者,上年補選就陪埋范國威着晒藍衫想cap(吸收)『本土票』,今次突然大轉軚,救唔返啲票㗎喎......(《蘋果》)當時由頭到尾都譴責暴力,班×樣連幾粒魚蛋嘅輿論空間都唔放生呀,今日突然話為咗幾粒魚蛋?之前唔係同『藍絲』同一陣線叫罵得好爽嘅咩?」

自稱熟悉心理學、人稱「Sam理專家」嘅「Sam Yiu Tong Wong」就簡單直接,四隻大字:「當日光速譴責『義士』嘅《蘋果》,我×你老母呀。」

究竟當日《蘋果》點樣譴責暴力?「Stephen Wong」幫大家回帶:《蘋果》即時新聞以「旺角凌晨爆發暴亂」形容事件,仲引用反對派「飯盒會」召集人何秀蘭、民主黨立法會議員劉慧卿等主流反對派譴責暴力嘅言論,第二日見報社論更寫到「我們對香港鬧市變成『戰場』感到非常痛心及難過,我們強烈譴責以暴力傷害市民、記者及警務人員的行為。」

當市民係金魚記憶

唔少網民心水清,睇穿《蘋果》都係為咗幫主流反對派拉票,好似係「Tokutaro Law」:「今年明年選舉年,毒果又要幫『飯民』認屎認屁打飛機來欺騙金魚記憶的香港人。」「Kasutera Fung」亦都話:「你食屎啦,扮乜×呀,偽善×!係你哋『泛民』第一時間跑出來譴責『本土』後生仔暴力㗎,......??家咁快幫『泛民』拉票,又選舉年啦!垃圾偽善!」

亦都有人覺得《蘋果》將成件事搞到勁低能。「William Au」話《蘋果》完全無視當時嘅時代背景,「姑勿論騷亂行動對與錯,爆發起因係自『傘運』失敗後對『公權力肆無忌憚地擴張』之一次民怨反彈。若然有話可以直說,直接抨擊騷亂行為,但唔好spin(兜)到為咗幾粒魚蛋咁低智。」

「Siu Sun」都有同感:「係唔係只為幾粒魚蛋咁簡單呀,不要利用小市民啦,點解唔坦白點(承認)係有預謀的 ,沒有人會怪罪你們的,暴力與否他日自有歷史去証(證)明,但如果沒有勇氣去承擔,就是懦夫。」

社交平台